كل اللي تحتاجه علشان تبدأ منقيتك.
تبدأ بـ10,000 وبر وشبك صغير يتسع 4 رؤوس، ومعه معلف وحوض. ومع أول دخول نجهز لك ناقة وفحل وأعلاف ووايت 6 طن وراكب آلي، والباقي يبقى في رصيدك.
الناقة البالغة تحتاج تقريباً 100 نقطة شبع في اليوم. الإبل تاكل من المعلف وتشرب من الحوض بنفسها، فخلهم مليانين. ادخل مرتين أو ثلاث في اليوم وعبّهم. الجوع يفرغ خلال يوم، والعطش خلال ثلاثة أيام تقريباً.
إذا جاعت الناقة أو عطشت تنقص صحتها، ويتوقف نموها. الإبل ما تموت: إذا وصلت صحتها للصفر تنتقل لرعاية النادي، وتقدر تستردها برسوم.
حوار ← مفرود ← لقي ← حق ← جذع ← ثني ← حيل أو زمول. يوصل الحوار للبلوغ خلال 30 يوماً تقريباً من اللعب.
التحصين صالح 14 يوماً، وهو شرط للمشاركة والبيع. والبيطري يعالج الناقة التعبانة.
الناقة من الجذعة فأكبر، والفحل من الثني فأكبر. الحمل يقارب 5 أيام. المولود يورث صفات أمه وأبوه مع تغيّر بسيط، ويورث اللون حسب لون الأبوين. وتزاوج الأقارب ممنوع لأنه يضعف النتاج.
التقييم على الرأس والرقبة (25%)، وأعلى الجسم (20%)، والمقدمة (15%)، والمؤخرة (10%)، والهيئة العامة (30%). نقاء اللون شرط لأشواط الألوان، والمخلوط يدخل الشوط المفتوح.
تحتاج راكب آلي، وتحصين ساري، وصحة 70 فأكثر. ضمّر ناقتك علشان ترفع لياقتها (3 حصص في اليوم). الأول ياخذ 25 نقطة دوري، والثاني 20، والثالث 15، والرابع 10، والخامس 5.
سوق النادي يعرض إبل جديدة كل يوم. وتقدر تبيع للنادي بـ60% من القيمة التقديرية (3 مرات في اليوم)، والحراج بين اللاعبين يفتح من المستوى 5.